Ou Mutual is weer op die oornamepad, dié keer in die gesogte Chinese mark.
Die Belgiese Fortis-groep gaan sy belang van 49% in die Chinese ABN Amro Teda-fondsbestuursgroep (Aateda) vir €165 miljoen (sowat R1,8 miljard) aan Ou Mutual verkoop.
Mnr. Steffen Gilbert, hoof van Ou Mutual se Asiatiese belange en voormalige uitvoerende hoof van Santam, het gesê die transaksie maak vir Ou Mutual deure oop. Hy bedryf sake vanuit die streekhoofkantoor in Hongkong.
Dit is die eerste keer dat Ou Mutual ’n belang in die Chinese batebestuursmark bekom. “Ons wil verder in die Chinese mark groei en bring innovering en kundigheid na die land.”
Batebestuurders wat in China belê, word gewoonlik tot belange van 25% beperk. Geleenthede soos dié doen hulle dus nie aldag in China voor nie, sê Gilbert.
ABN Amro Batebestuur en die Chinese staatsbeheerde Teda-groep bestuur Aateda saam. Die totale bates beloop meer as R23 miljard.
Die Chinese ABN Amro-belang het in Fortis se skoot beland nadat Fortis ABN Amro in Oktober verlede jaar as deel van die konsortium met die Royal Bank of Scotland (RBS) oorgeneem het.
Dit was die grootste bankoorname tot dusver, maar het in omstredenheid verval nadat Fortis se aandeelprys in reaksie op die wêreldwye subprima-debakel getuimel het. Fortis se voormalige uitvoerende hoof het ook daaroor sy pos verloor.
Volgens Fortis word hy verplig om een van sy Chinese ondernemings te verkoop. Dis ’n reguleringsvereiste.
Fortis moes kies tussen Teda en Fortis Haitong. Albei is winsgewende maatskappye.
Ou Mutual se ander belange in China is ’n gesamentlike onderneming met ’n staatsbeheerde batebestuursgroep om Skandia-gekoppelde produkte te verkoop. Effektetrusts word ook in die Australiese mark verkoop, terwyl Ou Mutual ’n belang van 26% in Indië deur Kotak Mahindra Ou Mutual hou. Die premie-inkomste in dié land neem sterk toe.
Ou Mutual voel egter dwarswinde in Asië weens die wisselvallige markte. Sy bedryfsverlies in dié streek het in die laaste ses maande van ₤1 miljoen tot ₤8 miljoen vergroot. In Australië was dit tussen 42% en 77% swakker. Die bates onder bestuur in Asië was 8% minder op ₤6 miljard.
Ou Mutual se aandeel het gistermiddag 34c of 2,46% swakker op R13,50 verhandel. Dit is binne trefafstand van die jaar-laagtepunt van R12,80 wat verlede maand aangeteken is.
Rand/£: 15.5900
Platts Brent Olie: 46.51
Vind jou ou
