Altesame 80% van sy sake is uitvoer, maar hy bly verbind tot Suid-Afrika en dienslewering aan die Suid-Afrikaanse weermag.

Dít is hoe mnr. Johan Steyn, OMC in Benoni se besturende direkteur, gister die onderneming se fenomenale groei die afgelope paar jaar opgesom het.

Steyn het op ’n mediavoorligtingsessie gesê Suid-Afrika word steeds beskou as een van die ses sterkste markte van die onderneming wat pantservoertuie vir lande soos die VSA en Kanada vervaardig.

OMC word tans gereken as die derde grootste van sy soort ter wêreld. Honderde van sy voertuie vervul ’n sleutelrol in die oorloggeteisterde Irak en Afganistan.

Die gehalte van die voertuie spreek uit etlike voorbeelde waar die voertuie ploftoestelle afgetrap en erg beskadig is, maar die insittendes sonder enige beserings daarvan afgekom het.

Volgens Steyn moes OMC in die 1990’s toe dit duidelik geword het dat die groot wapenopgraderingspakkette van die weermag op die vloot en die lugmag gaan konsentreer, ’n revaluasie van sy benadering tot die toekoms maak. “Ons het besluit om op ons sleutelvaardighede – pantservoertuie – te konsentreer, ’n globale vennoot te kry (BAE Systems) en ons bemarking op bepaalde markte toe te spits aangesien die weermag nie meer soos in die verlede ons vernaamste klant sou wees nie.

“Ons het gaan kyk wat die wêreldwye behoefte was en ons produkte daarby aangepas.”

Dit was die regte benadering op die regte tyd – net toe die Amerikaners in Irak begin betrokke raak en hul voertuie nie die mas kon opkom teen landmyne en ploftoestelle nie. Van 1999 het OMC se uitvoer hand oor hand toegeneem en sedert 2004 van R1 miljard tot R2,3 miljard in 2008 gegroei. Dit sal na verwagting R5 miljard beloop binne die volgende vyf tot sewe jaar.

In die proses is meer as 300 werkgeleenthede geskep, sowel as vaardighede onder die werkers gevestig om van een model se produksielyn ewe gemaklik oor te skakel na ’n ander na gelang van die bestellings.

Volgens mnr. Jacques Vos, OMC se bestuurder van ingenieursdienste, lê die geheim van die vervaardiger se sukses in die feit dat hy die klante se behoeftes in werkbare tegnologie omskep en dít in rekordtyd.

Die maatskappy se rekord om ’n unieke voertuig vanaf ontwerp tot finale produksiemodel te voltooi, is ses weke.

“Ons tipies Suid-Afrikaanse benadering van ‘can do’ verstom van ons oorsese klante en het deel van ons reputasie geword,” het Vos gesê.