Dit is wat ’n Vodafone-aanbod vir nóg ’n deel van Vodacom, Suid-Afrika se grootste selfoondiensverskaffer, tot gevolg kan hê.

Vodafone wil ’n verdere 15% van Vodacom se aandele bekom om sy belang op 65% te staan te bring.

Telkom en Vodafone hou in dié stadium elk 50% in Vodacom.

Die Vodafone-aanbod behels ook dat die res van Telkom se belang in Vodacom ontknoop en op die JSE genoteer word.

Die transaksie sal Telkom ook in staat stel om self die selfoondienstemark te betree en met MTN, Cell C en Vodacom, sy voormalige telg, mee te ding.

Ander in die telekommunikasiesektor het die aanbod verwelkom en meen dit sal die verbruiker bevoordeel.

“Ek glo die groter mededinging gaan die mark herskik en kliënte van meer keuses voorsien,” het mnr. Anton Potgieter, uitvoerende hoof van Huge Group, gister in ’n verklaring gesê.

“Uit ’n verbruikersoogpunt beskou, sal ons sien dat die vernaamste rolspelers (in die bedryf) binnekort dienste sal moet verskaf wat waarlik waarde toevoeg.”

Telkom-aandele het gister aanvanklik gunstig op die aanbod – en ’n verklaring deur Telkom dat sy direksie te vinde is vir die transaksie – gereageer.

Die Suid-Afrikaanse vastelyndiensverskaffer het met meer as 4% op die JSE opgeskiet in oggendverhandelinge terwyl die beurs in die geheel slae gekry het en meer as 4% laer was.

Telkom het egter weer teruggesak om uiteindelik net 0,18% stewiger op R108,50 te sluit.

Vodafone-aandele het in Londen skerp gedaal en was aanvanklik ’n volle 16% swakker op sowat 100p. Dié aandeel het egter later van die verlore veld teruggewen en laatmiddag teen meer as 110p verhandel.