Die prospektus van die jongste maatskappy van die Rupert-familie is Vrydag net ná die mark se sluiting versprei.

Reinet is genoem na Graaff-Reinet, die geboortedorp van wyle dr. Anton Rupert, wat die Rupert-ryk uit tabak begin het.

Reinet het sy ontstaan uit die herstrukturering van Richemont, wat ook deur die familie beheer word.

Die grootste bate van Reinet is ’n gedeelte van Richemont en Remgro (nog ’n Rupert-maatskappy) se belang in die tabakmaatskappy British American Tobacco (BAT).

Beleggers het die afgelope twee maande angstig gewag op die prospektus. Daar heers taamlike opgewondenheid oor nóg ’n Rupert-maatskappy waarin beleggers kan belê. Die rede is die opbrengste wat die familie se maatskappye oor die jare gelewer het.

Reinet gaan in Luxemburg genoteer wees en deur depositobewyse op die Johannesburgse JSE.

Aandeelhouers in Richemont en Remgro gaan in ruil vir die belang in BAT wat deel van Reinet word, Reinet-aandele ontvang. Hulle kry ook later die reg om BAT-aandele vir nog Reinet-aandele te verruil.

Die maatskappy se aandelekapitaal bestaan uit twee kategorieë, bestuursaandele en gewone aandele wat deur aandeelhouers gehou word. Dié maatskappy se beleggings gaan deur die beleggingsvoertuig Reinet Fund gehou word. Die beleggingsdoelwit van Reinet Fund is kapitaalgroei oor die lang termyn.

Reinet gaan deur Reinet Investments Manager bestuur word. Dié onderneming word deur die Ruperts beheer.

Reinet-fonds gaan deur Reinet Fund Manager bestuur word, wat ’n duisend bestuursaandele in die fonds hou. Reinet Fund Manager word ook deur die Ruperts beheer.

Reinet Fund Manager het ’n beleggingsraadgewersooreenkoms met Reinet Investment Advisors Beperk, wat beleggingsvoorstelle aan die bestuur sal doen. Die beleggingsraadgewer gaan ook besit en beheer word deur Rupert-familiebelange. Die Reinet-maatskappy gaan Reinet Investment Manager en Reinet Fund Manager se uitgawes dra, asook aan eersgenoemde ’n jaarlikse tarief betaal. Die beleggingsraadgewer gaan ook ’n bestuurs- en prestasietarief ontvang.

Onder risiko’s word aandeelhouers daarop gewys dat die Rupert-familie ’n wesenlike invloed op die onderneming gaan uitoefen en “dit kan onderhewig wees aan ’n konflik van belange”. Dit is nuut gestig en het nie ’n bedryfsgeskiedenis nie.

Remgro se aandeelprys het Vrydag met R10 geval tot R167.

BAT het met sowat ₤2 gesak tot ₤14,68. Net Richemont het effens gestyg met 10c tot R34,30.