DigiCore Holdings is weer winsgewend nadat hy die afgelope paar maande verskeie groot kontrakte, waaronder 'n kontrak ter waarde van R150 miljoen van debis Fleet Management, ontvang het.
Die maatskappy se aandeelprys het in reaksie met 13,8% of 4c tot 33c gestyg.
Die groep het in sy kwartaalverslag vir die drie maande tot einde September bekend gemaak hy het in dié tydperk 'n bedryfswins van R10,79 miljoen behaal wat heelwat beter is as die R3,818 miljoen wat in die voorafgaande 12 maande behaal is.
Mnr. Nic Vlok, DigiCore se besturende direkteur, sê die maatskappy is nou op koers om sy voorspelde omset van R300 miljoen vir die boekjaar tot einde Junie aanstaande jaar te behaal.
Die groep het R14 miljoen kontant in die bank en daar word voorsien dat dit netto rentebetalings wesenlik sal verminder.
DigiCore sê die debis-kontrak is deel van die tendens onder ondernemings om hul voertuigvlote uit te kontrakteer Dié kontrak kan bykomende kontrakte vir die groep meebring.
"Ons het nooit ons begroting vir navorsing en ontwikkeling ingekort nie, hoewel ons 'n moeilike tydperk beleef het," sê Vlok.
DigiCore se C-Track-toestel het onlangs 'n toekenning vir uitstekende produkinnovasie en verliesvermindering van die voertuigbeveiligingsvereninging van Suid-Afrika (Vesa) ontvang. Vlok sê dié toekenning bewys dat die groep tegnologie van wêreldgehalte ontwikkel.
Vlok voorsien voorts dat sy inkomste uit buitelandse bedrywighede sal toeneem en dat die groep sal voldoen aan sy voorspelling om oor die volgende drie jaar jaarliks met 30% te groei.
Rand/£: 15.9300
Rand/€: 12.5200
Vind jou ou
