“Die rand is nie terug waar hy vandag begin het nie, maar ons het in die namiddag redelike data gesien en aandele het versterk,” sê me. Lucy Bethell, ’n geldeenheid-ontleder by die Royal Bank of Scotland nadat talle Suid-Afrikaanse maatskappye goeie resultate aangekondig het.

Die JSE se indeks van alle aandele het weer bo 32 000 punte gesluit deur altesame met 1,21% te klim tot 32 387,01.

Twee van die groot mynbou-aandele het die meeste van die opwaartse momentum verskaf.

BHP Billiton, wat sowat 15% van die totale markwaarde op die JSE verteenwoordig, het met 4,5% geklim te midde van volgehoue spekulasie dat die staatsbeheerde Chinese Aluminium Corporation ’n belang in die gediversifiseerde reus soek.

“Daar is sprake van ’n aanbod teen ’n premie op die huidige aandeelprys, sê mnr. Jawaid Afsar, ’n makelaar by Securequity in Engeland, oor gerugte dat ’n Chinese staatsinstelling BHP Billiton-aandele wil koop.

“Die krag van Billiton lei duidelik die mark,” sê mnr. Alex Murra, portefeulje-bestuurder by Anglorand Securities.

Anglo Platinum, die wêreld se grootste platinumprodusent wat feitlik uitsluitlik in Suid-Afrika myn, het ook met 4,88% gespring tot R1 311,00.

Sy moedermaatskappy Anglo American het self met 2,22% tot R506,49 geklim.

Elders op die beurs het die konstruksiegroep Murray & Roberts Holdings sy beste vertoning in vier maande gemaak met ’n 6,6%-sprong tot R87,90.

Hy het gister aangekondig dat sy bestelboek met 16% gegroei het in die drie maande tot einde Maart. Die groep het einde Maart oor kontrakte ter waarde van R44 miljard beskik.

Die land se grootste rekenaar-dienstemaatskappy, Dimension Data, het gister aangekondig sy tussentydse wins is 71% hoër op $55,9 miljoen. Daarna het sy aandele met 5,2% tot R7,93 geklim.

SABMiller het ook goed gevaar nadat agt ontleders wat deur Bloomberg gepols is, voorspel het dat die brouery se netto inkomste met 21% tot $2 miljard kan styg vir die boekjaar 2008. SABMiller-aandele het 2,4% hoër op R179 gesluit.

Die top 40-indeks het met 1,34% gestyg tot 30 402,99 punte al het ’n aantal van die beurs se voorste aandele swaargekry.

Kumba Iron Ore het met 3% geval tot R315,00 terwyl die petrochemiese reus Sasol 1,13% van sy markwaarde verloor het om op R479,50 te sluit. – Reuters en Bloomberg