Die indeks van alle aandele het ná twee hoogtepunte dié week teen gister nog nie stoom verloor nie en sommer die week met ’n derde hoogtepunt afgesluit. Dit is boonop die vyfde hoogtepunt in Mei, wat nog net halfpad is.

Die indeks was teen gistermiddag goed op pad om deur 33 000 punte te druk. Dit het egter by 32 965,68 omgedraai en op 32 700,98 gesluit – 53,55 punte of 0,16% hoër as Donderdag se hoogtepunt.

Die indeks van top-20-hulpbronaandele het gesluit op 75 008,07. Dié sluiting is 587,52 punte of 0,79% hoër en self ook ’n nuwe hoogtepunt.

Onder hulpbronaandele het veral platinum baie aandag van kopers geniet. Die platinumindeks was 3,09% hoër op 141,22 punte. Die goudindeks het egter met 0,77% teruggesak tot 2 472,40. Veral Anglo Platinum het uitgeblink met ’n nuwe hoogtepunt van R1 406,01 per aandeel, ’n 4,69%-verbetering op die vorige hoogtepunt wat in Maart behaal is.

Die prys van platinum was heelwat hoër op $2 131,00 per ons. Die goudprys het gister deur $900 per fynons gebars, die eerste keer in drie weke. Dit is egter nog ’n hele ent tot by die hoogtepunt van $1 030,80 wat in Maart bereik is. Die olieprys het ook ’n nuwe rekord behaal in ’n styging wat aangehelp is deur ’n swakker dollar en ’n groot vraag deur China en Europa. Brent-ruolie sal kopers amper 1,5% meer uit die sak jaag teen $124 per vat.

Die grootste maatskappye op die beurs, Anglo American en BHP Billiton, het albei met hoër aandeelpryse gespog. Anglo het 0,97% bygevoeg tot sy prys en op R518,27 per aandeel te staan gekom. Billiton, oor wie gefluister word dat die Chinese in hom belang stel, se aandeelprys was 0,66% hoër op R319,73.

Die verstewiging van die rand het bygedra tot die JSE se goeie lopie. Die rand was teen gistermiddag laat R7,4635 teenoor die dollar, bykans 1% sterker – die sterkste sedert Februarie.

Die aandeelprys van MTN, wat vandeesmaand in ’n reeks oorkoopbespiegelinge betrek is, het gister amper 1% laer gesluit op R152,73.

Imperial-aandele het ook met 1,79% teruggesak tot R55,98 per aandeel. Eqstra Holdings is Maandag uit Imperial ontknoop en afsonderlik genoteer. Eqstra-aandele was gister op R15,50 reeds R2,49 laer as met sy notering.

’n Positiewe stemming het wêreldwyd geheers.

Slegs Tokio se Nikkei het 0,23% laer gesluit op 14 219,48 punte. In Londen het die FTSE 100 0,88% hoër gesluit op 6 305,60 punte. Die DAX in Frankfurt het met 0,86% geklim tot 7 143,81 punte. Teen 17:00 was die Nasdaq in die VSA slegs 0,08% hoër op 2 506,81 punte as met sy vorige sluiting.