’n Mini-eksodus vanaf onderwaardeerde hulpbron- na finansiële aandele was gister kenmerkend van die JSE.

Die indeks van alle aandele het met moeite positief gebeur en die bul het die stryd net-net teen die beer gewen. Die indeks het die dag 0,4% hoër op 27 373,79 punte afgesluit.

Op die internasionale markte het beleggersoptimisme behoorlik geloop met stewige vertonings in bykans ál die belangrikste markte.

In die Ooste het Tokio se grootste indeks met 1% geklim, Shanghai was 0,3% laer en Hongkong het met 2,7% voortgestoom. Sydney se S&P-200 het met 2% verbeter, Singapoer was 3,1% hoër en Moembaai het 5,9% gewen.

Teen 17:50 het Europese markte ook die welwillendheid van positiewe beleggers geproe en was Frankfurt 1,5% stewiger en Parys en Londen 1,8% in die swart.

Wall Street het twee ure na sy opening ook beter gevaar met die Dow Jones 0,3% hoër, die Nasdaq 1,1% stewiger en die S&P-500 met 0,7% in gesonde terrein.

Finansiële aandele het behoorlik die kollig gesteel. Die indeks van top-15 finansiële aandele het die dag met 6,6% opwaarts afgesluit.

Veral die lewensversekeraars, wat die afgelope twee weke nog teen jaar-laagtepunte verhandel het, het geblom.

Ou Mutual, die grootste in terme van markwaarde, het met 10,4% tot R15,54 verstewig. Sanlam het in die partytjie gedeel en met 8,5% verstewig.

Banke was nie ver agter nie. Standard Bank het vér voor geloop en met 8,6% tot R85 gespring. Investec Ltd het beleggers met ’n styging van 6,5% beloon en FirstRand was 6,2% beter. Rand-Aksepbank Beherend het met 5,8% opgeskuif, Nedbank met 5,5% en Absa met 4,5%.

Hulpbronne was die swartskaap van die beurs.

Met tanende vooruitsigte vir wêreldwye ekonomiese groei, ’n sterker dollar en swakker olieprys, het goud gister nogmaals geboet. Die kontantprys van goud is in die oggend in Londen op $934,75 per fynons vasgestel en het daarna kwaai gegly tot $926,50.

Goudaandele het gebloei en die goudindeks van die JSE was met 5,3% in die rooi.

Die grootste slagting was onder Harmony-aandele wat met 8,2% tot R80 getuimel het. Gold Fields het in dié bloederige spore gevolg met ’n daling van 6,8% tot R89,35.

DRDGold het met 5,4% geval. AngloGold Ashanti was dié kliniese beleggersentiment gespaar en het “net” 3,3% verloor tot R251.