Die JSE se indeks van alle aandele het nie ’n indrukwekkende vertoning gelewer nie en met ’n skamele 56 punte geklim tot 27 430,12 punte. Die top-40 het 0,15% gewen.

Finansiële aandele het egter steeds voortgebeur, maar platinumaandele het gely.

Op die internasionale markte het die Ooste presteer, maar Europa en Wall Street kon nie die mas opkom nie.

In Tokio was die belangrikste indeks met 2,2% op, was Sjanghai 2,6% beter en het Hongkong geglip met 0,2%. Singapoer was met 0,4% in die rooi. Sydney het met 0,8% geklim en Moembaai was met 1,1% af.

In Europa het Frankfurt teen 17:35 met 1,7% gekrimp, was Parys met 1,6% laer en het Londen met 1,8% gegly.

Wall Street het ook nie gesond gelyk nie en die Dow Jones, Nasdaq en S&P-500 was al drie met 1,2% in die rooi.

Op die plaaslike mark het die indeks van top-15- finansiële aandele met 1,4% verbeter.

Die banke het nie teleurgestel nie en Standard Bank het nóg ’n goeie dag gehad deur met 349c te verstewig tot R88,49. Absa was met byna 4% hoër op R99,75 en FirstRand het 2,5% gewen tot R15,89. Investec Ltd het 90c gewen tot R49,90, maar Nedbank het uitgeval en 35c verloor tot R102,65. Rand-Aksepbank Beherend het met 4,8% verstewig tot R24,89.

Die lewensversekeraars moes met winsneming tevrede wees ná hul gesonde lopie eergister. Ou Mutual was met byna 1% laer op R15,39 en Sanlam het 34c verloor tot R17,45.

Aan die nywerheidskant van die beurs het dit ook goed gegaan en die indeks van top-25-nywerheidsaandele het met 1,3% verbeter.

Veral konstruksie-aandele het geskitter. Basil Read het met 8,3% opgeskiet tot R26. Murray & Roberts was met 2,9% beter op R89 en WBHO het 305c tot R113,05 gewen. Group 5 het met 114c tot R43,75 geklim. Aveng was 3,6% beter op R56,98 en PPC het met 2,9% tot R31,90 gestyg.Die padbouer Raubex het 69c by sy aandeelprys gevoeg tot R33,79.

Platinumaandele het ’n verdere dag van verliese gely en die platinumindeks was met meer as 2% in die rooi.

Wesizwe het veral gebloei en met 6,5% tot R5,15 gekrimp. Anglo Platinum was met 2 300c af tot R925 en Impala Platinum het 400c verloor tot R228. Lonmin het 3,2% laer gesluit op R367,75.