Dit is die boodskap van Merrill Lynch in sy jongste maandelikse fondsoorsig. Altesame 50% van die deelnemers aan die ondersoek – wat Suid-Afrika se voorste batebestuurders insluit – meen aandeelpryse gaan oor die volgende 12 maande styg.

Dit is beduidende verbetering op die 13% van die vorige maand. Terselfdertyd het net 4% aangedui hulle is optimisties oor die vooruitsigte vir die geldmark teenoor ’n stewige 44% die vorige maand.

Oor die volgende drie maande kan onsekerheid nog heers in die aandelemarkte, maar 69% glo die markte sal oor die volgende ses maande styg. Die gunstelingsektore van die JSE sluit in banke, telekommunikasie, kleinhandel en media. Lewensversekering, goud en platinum wek die minste belangstelling.

Die platinumprys het Vrydag sy grootste verlies in ’n week in bykans agt jaar ervaar, onder meer in reaksie op die sterker dollar. Die indeks van alle aandele se gemiddelde prys-verdienste-veelvoud (p/v) beloop tans 13,6, hoofsaaklik vanweë die hoë waardasies van platinumaandele. Die top-15-finansiële aandele se p/v is 9,65.

Heelwat beleggers het die afgelope jaar van die aandele na die geldmark geskuif om die voordele van hoër rentekoerse te ervaar. Volgens fondsbestuurders is die rentesiklus nou op sy hoogtepunt.

Hiervolgens kan die eerste rentekoersverlaging reeds in die tweede kwartaal van aanstaande jaar plaasvind. Die vooruitsigte vir rentekoerse het volgens die ondersoek drasties verander, met 80% wat meen die volgende stap sal ’n verlaging wees. Verlede maand het 63% gemeen dat koerse verder sal styg.

Die Reserwebank se monetêrebeleidskomitee het verlede week besluit om die repokoers op 12% te hou en so die prima oortrekkingskoers onveranderd op 15,5% te laat.

Mnr. Cees Bruggemans, hoofekonoom van Eerste Nasionale Bank, sê dit is moontlik dat die Reserwebank al in Desember koerse kan begin verlaag. “Maar miskien sal hy eerder wil wag tot Januarie om met die proses te begin.”

Me. Annabel Bishop, ekonoom van Investec, verwag geen verdere koersverhogings vir vanjaar nie. Sy verwag die eerste verlaging in April 2009.

Ekonome is heelwat meer optimisties oor inflasie as die Reserwebank. Die Reserwebank verwag dat inflasie eers in die tweede helfte van 2010 na die VPIX-teikenvlak van tussen 3% en 6% sal terugkeer. Bishop meen dit sal in die tweede helfte van 2009 gebeur.

Laer rentekoerse is tradisioneel positief vir aandele.