Die verhoging van 5c per liter in die inkomste wat die Padongelukfonds uit die brandstofprys kry, is gister gekritiseer omdat die fonds tegnies bankrot en deurtrek met bestuursonbevoegdheid is.

Die brandstofheffing vir die fonds is in Woensdag se begroting met 5c van 41,5c per liter tot 46,5c per liter opgeskuif. Dit beteken dat brandstofpryse saam met die verhoging van die algemene brandstofheffing van 1 April met 11c per liter sal styg.

Dit is afgesien van die gewone maandelikse aanpassing van brandstofpryse, wat in hierdie stadium weens die daling van die rand en stygende ruoliepryse meestal opwaarts is.

Mnr. Stuart Farrow, die DA se woordvoerder oor vervoer, het gister gesê dit is problematies om bykomende inkomste van sowat R1 miljard vir die fonds uit brandstofverkope te bewerkstellig voordat die oorsake van die fonds se geldtekort opgelos is.

Hy het voorgestel dat weer gekyk word na die wysigingswet op die fonds, wat in 2005 reeds goedgekeur is, maar nog nie in werking gestel is nie.

Volgens die Padongelukfonds se jaarverslag vir 2007 is die fonds reeds ’n aantal jare insolvent. Verskeie kommerwekkende kwessies word daarin uitgelig, soos swak interne beheer, tekortkominge in die eisebestuursproses en bewerings van bedrog. Die verslag toon dat die fonds se netto tekort in 2007 R1,9 miljoen was.

Die aantal uitstaande eise het op 31 Maart verlede jaar op 341 146 gestaan.

In Desember verlede jaar het die Johannesburgse Prokureursvereniging ’n verklaring uitgereik wat verklaar dat die fonds nie in staat is om homself te bestuur nie.