Mnr. Trevor Manuel, minister van finansies, het die vinger op die regte plekke gesit met die jongste begroting, maar was nie daadkragtig genoeg nie.

Dít was die mening van die People’s Budget Campaign (PBC) gister. Die PBC, ’n vennootskap tussen Cosatu, die SA Raad van Kerke (SACC) en die SA nie-regeringskoalisie (San­goco), lug reeds ’n paar jaar sy mening oor die begroting en het gister sy “wenslys” vir die volgende begroting bekend gemaak.

“Ons het saamgestem met pres. Thabo Mbeki se (staatsrede-)tema van ‘business un­usual’, maar ons dink nie dit is deurgevoer in die begrotingstoespraak nie,” het mnr. Zwelinzima Vavi, hoof­sekretaris van Cosatu, gesê.

Wat Suid-Afrika nodig het, meen die PBC, is ’n begroting wat ongelykhede uit die weg ruim. En só ’n begroting het nie noodwendig ruimte vir ’n oorskot nie. Woensdag is begroot vir ’n oorskot van R16 miljard in die komende boekjaar wat tot R20 miljard in 2010 toeneem. Dit is ’n gemiddelde oorskot van 0,7% van die BBP.

Kommer is ook uitgespreek daaroor dat transformasie nie reg gehanteer is deur die regering nie. Apartheidstelsels is volgens die PBC steeds deel van die land se gesondheidsdienste, maatskaplike diensverskaffing, werkskepping, grondhervorming en behuising.

Daar is wel erkenning gegee daaraan dat Manuel werkskepping beklemtoon het. Tog meen die PBC nie die verlaging van die maatskappybelastingkoers sal noodwendig die werkloosheidsprobleem verlig nie. Die maatskappybelastingkoers is deur Manuel verlaag van 29% tot 28%.

Vavi het ook aandag geskenk aan die PBC se beeld. Volgens hom word die organisasie toenemend as populisties bestempel. “Al wat ons wil hê, is ’n beter bestaan vir almal in die samelewing.”

Die Konfederasie van Suid-Afrikaanse Werkersvakbonde (Consawu) het aangekondig dat hy nie sal deel in die feesvieringe oor die “sogenaamde goeie begroting” nie. Consawu meen ook die verligting van KMO’s se belastinglas sal nie indiensneming verhoog nie.