Dit het aanleiding gegee tot spanning en onluste in verskeie lande, soos Kameroen, Burkina Faso, Haïti en Egipte.

Na raming kan stygende voedselpryse minstens 100 miljoen mense in lae-inkomstelande in akute armoede dompel.

Tans is daar ’n neiging by sekere lande om binnelandse markte te probeer beskerm, maar die konsensus is dat internasionale graanmarkte “oop” moet bly en soos normaalweg moet funksioneer.

In Suid-Afrika is mense ook bekommerd oor die skerp styging in voedselpryse, wat ’n groot bydrae lewer tot die styging in inflasie. Voedselpryse het reeds meer as 26% tot VPIX-inflasie bygedra.

Die departement van minerale en energie het wel aangekondig dat mielies nie in die aanvanklike fases van die land se biobrandstofprojekte aangewend sal word nie. Dié besluit is juis geneem weens die besorgdheid oor voedselsekuriteit en vrese vir moontlike stygings in die mielieprys.

Kyk ’n mens na plaaslike voedselmaatskappye, is daar aanduidings dat die situasie tog sommige positief raak.

Tiger Brands

Tiger Brands se prys is tans op ’n stewige galop, met verhandeling ver bo die 21-dae- en 40-dae-gemiddeldes. Hoewel sy aandele reeds gretig gekoop is, is daar nog geen duidelike verkoop?tekens nie. ’n Hou-aanbeveling kan dus gemaak word.

Ander in dié sektor wat tegnies ook ’n hou-aanbeveling regverdig, is Illovo, Oceana en Tongaat.

AVI

AVI is in Suid-Afrika gesetel en fokus op die verbruikersmark vir bekende handelsmerke.

Die sleutelvaardighede van die maatskappy is die bemarking, verwerking en vervaardiging van voedsel, drinkgoed, skoene en kosmetiese produkte.

Uit ’n waardasie-perspektief is AVI in ’n regverdige posisie met sy prys-verdienste-veelvoud (p/v) relatief teenoor groeivooruitsigte van 81 punte. Enig?iets tussen 76 en 135 punte word as goeie waarde bestempel. ’n Syfer bo 136 punte is dikwels ’n aanduiding dat die maatskappy se prys te ver gestyg het.

Die tegniese grafiek van AVI toon dat die aandeel steeds bo die 21-dae- en 40-dae-gemiddeldes verhandel, maar dit verhandel ook bo die opwaarts neigende ondersteuningslyn.

Die bewegende-gemiddelde-konvergerende-en-divergerende-aanwyser (BGKD – wat nie hier gewys word nie) is net onder die snellerlyn in ’n oorgretig verkoopte gebied, terwyl ’n toename in die volume aandele wat verhandel word, moontlik wys dat groter momentum na die bokant vir die aandeelprys kan ontwikkel.

AVI bly egter tegnies ’n hou-aanbeveling, net soos Afgri met ’n p/v relatief tot groeivooruitsigte van 81.

Aan die ander kant is Astral ondergewaardeer en verhandel hy op ’n p/v relatief teenoor groeivooruitsigte van 62. Terselfdertyd verhandel Astral onder sy bewegende gemiddeldes met ’n algemene neiging wat nie baie positief lyk nie.

Dit toon ook dat die volume taamlik verspreid is en nie momentum opbou nie. Wag totdat die neiging na ’n bullopie omkeer voordat oorweeg word om die aandeel te koop.

Sovereign Food Investments

Die derde tegniese grafiek waarna ons kyk, is dié van Sovfood. Sovereign Food Investments is die beheermaatskappy van drie bedryfsmaatskappye in die hoenderbedryf wat strek van teel- en boerderybedrywighede en die vervaardiging van dierevoer tot die verdere verwerking van hoenderprodukte.

Sovfood is aansienlik ondergewaardeer en verhandel op ’n p/v relatief tot groeivooruitsigte van 57.

Die tegniese grafiek wys dat dit onder sowel die 21-dae- as die 40-dae-gemiddelde verhandel en die neiging bly negatief.

Dit is ook steeds oorverkoop en ons stel voor dat lesers wag totdat daar aanduidings is dat die aandeelprys opwaarts kan begin beweeg.

) Van den Berg is die hoof- tegniese ontleder by PSG Online.