Adcock Ingram Critical Care het sy moedermaatskappy Tiger Brands R53,5 miljoen uit die sak gejaag weens sy kartelbedrywighede.

Die beleërde Tiger het vroeër bykans R100 miljoen opgedok weens sy broodgroep Albany se betrokkenheid by ’n kartel wat pryse vasgestel het.

Adcock se boete verteenwoordig 8% van sy omset. Die Mededingingswet bepaal dat ’n maatskappy wat hom skuldig maak aan onder meer samespanning ’n maksimum administratiewe boete van 10% opgelê kan word.

Tiger en die Mededingingskommissie het die skikkingsooreenkoms bereik nadat Adcock skuldig bevind is kartelgedrag en die saak na die Mededingingstribunaal vir finale beslissing verwys is.

Mnr. Peter Matlare, nuwe uitvoerende hoof van Tiger Brands, sê hulle is ‘uiters ontsteld en verleë’ oor die nuutste kartelskandaal waarin die groep hom bevind.

Die Mededingingskommissie het Tiger se filiaal Adcock Ingram Critical Care met R53,5 miljoen beboet.

Matlare sê Tiger Brands is vasbeslote om enige onmededingende gedrag in die groep te identifiseer en dit te hanteer.

Tiger Brands is volgens hom ook vasbeslote om sy reputasie van integriteit en gesonde korporatiewe beheer te herstel.

Teken in op Beeld, Die Burger of Volksblad om jou Sake24 elke dag te kry