Singapoer. – Singapore Telecommunications is aktief betrokke in die oorname gesprekke tussen Bharti Airtel en MTN, het ‘n bron vandag aan Reuters gesê.
“SingTel is deel van die span wat na die aangeleenthede saam met Sunil en Akhil kyk,” het dié bron gesê.
Die bron het gesê dit is te vroeg om te sê of SingTel, wat Bharti se grootste aandeelhouer is, enige vorm van finansiële steun vir Bharti sal bied om die aanbod te versterk.
“Dit hang af van die finale struktuur van die onderhandeling. Dit mag die geval wees dat geen finansiële steun benodig word nie. Daar is geen besonderhede op hierdie stadium nie. Dit is ‘n baie ingewikkelde onderhandeling,” het die bron gesê, en geweier om sy identiteit bekend te maak omdat die besonderhede nog nie gefinaliseer is nie.
Intussen berig Bloomberg dat Vodafone, die wêreld se grootste selfoonmaatskappy, ontken dat hy ‘n aanbod vir MTN gaan maak, en het gesê hy stel meer belang daarin om ‘n groter belang in Suid-Afrika se Vodacom-groep te besit.
“Ons het geen planne om ‘n aanbod vir MTN te maak nie,” het mnr. Simon Gordon, Vodafone se woordvoerder, vandag gesê. Die <i>Sunday Times</i> het gister berig dat Newbury, die Brits-gebaseerde Vodafone $39 miljard kan aanbied om MTN te koop. – Bloomberg en Reuters
Rand/£: 15.2500
Vind jou ou
