Johannesburg. – Vulstasie-eienaars het tyd tot die einde van die jaar om brandstofpompe wat nie pryse oor drie syfers kan vertoon nie, te vervang of aan te pas, het die Suid-Afrikaanse Buro van Standaarde (SABS) vandag gesê.

Sekere petrolpompe het nie die vermoë om meer as drie syfers te wys nie en kan dus nie brandstofpryse bo R9,99 toon nie.

Die SABS het gesê dat hulle, saam met die departement van minerale en energie, saamgestem het om eienaars ‘n konsessie te gee in terme van die Handelsmetrologiewet, wat gelyke handel en nasionale standaarde verseker.

Maatskappye kry ‘n kans om voor die einde van die jaar verstellings te maak of nuwe petrolpompe aan te koop, maar tot dan moet die prys per liter op dié pompe as ‘n tiende van die werklike prys vertoon word.

Die prys per liter en die prys om te betaal sal met

tien vermenigvuldig moet word, en plakkers wat “X10” wys, sal aan dié pompe aangeheg word. – Sapa