Omaha. – Mnr. Warren Buffett, die wêreld se rykste mens, het gesê die VSA is in ’n resessie. Dit is in teenstelling met ’n regeringsverslag wat swak groei toon.

Buffett het sy mening gelug op ’n nuuskonferensie ’n dag nadat ’n rekordgetal van 31 000 aandeelhouers van Berkshire Hathaway dié versekering- en beleggingsmaatskappy se jaarlikse vergadering in Omaha bygewoon het.

Die departement van handel het verlede Woensdag gesê die ekonomie se jaarlikse groeikoers in die eerste kwartaal is 0,6%. Maar Buffett het gesê die land se bevolking het ook gegroei, wat die werklike groeikoers verlaag. Hy het ook gesê dat, alhoewel inligting nie aandui dat die ekonomie inkrimp nie, mense dit kan voel.

“Die VSA is in ’n resessie soos ek dit definieer,” het Buffett gesê. “Ek definieer dit as ’n situasie waar mense nie so goed doen soos drie, ses of agt maande gelede nie en meeste ondernemings bevind hulself ook in hierdie posisie.”

Swak resultate by Berkshire-eenhede waar stene, matte en ander produkte verkoop word en wat afhanklik is van ’n gesonde huismark, het bygedra tot ’n 64%-afname in die eerste kwartaal se wins.

Behuising is steeds ’n kritieke probleem, het hy gesê, met honderdduisende huiseienaars wat hul verbandleningpaaiemente sien styg of wie se huise minder werd is as wat hulle daarop skuld.

Buffett het gesê hy het ’n brief aan mnr. Henry Paulson, minister van finansies, geskryf waarin hy voorstel dat mense wat verbandlenings aangaan, bewus gemaak moet word van die maksimumbedrae wat hulle moontlik sal moet terugbetaal.

Volgens Buffett kan die regering leners help wat mislei is oor wat hulle skuld, maar hy is gekant daarteen om mense te help net omdat hul huise se waarde verminder het, of beleggers wat verbandleningsekuriteite gekoop het sonder om die risiko daaraan verbonde te begryp.

Hy het gesê behuisingprobleme sal banke se resultate “vir ’n paar jaar” aftrek en dat die bedryf se groot verliese en afskrywings weens swak skuld “nog lank nie iets van die verlede is nie”.

“Daar gaan verseker nog baie pyn wees.”

Tog het hy gesê die Amerikaanse Federale Reserwebank se bystand wat JP Morgan Chase gehelp het om die byna bankrot Bear Stearns te koop, het die aansteeklikheid van moontlike bankstormlope op ander beleggingsbanke gekeer.

“Die idee van finansiële paniek. . . is baie goed uit die weg geruim,” het hy gesê. “Dit was ’n waterskeidingsgebeurtenis.” – Reuters