Parys. – Société Générale, die Franse bank wat deur die wêreld se grootste handelskandaal tot nog toe getref is, het ’n 23,4%-afname in sy eerste kwartaal se netto wins aangekondig, al was sy verdienste hoër as die gemiddelde markverwagting.

Sy netto wins het geval tot E1,096 miljard of $1,69 miljard, hoofsaaklik weens ’n 79%-daling in netto wins by sy korporatiewe en beleggingsbankdiens-afdeling en ’n verlies by Société Générale se wêreldwye beleggingsbestuurseenheid.

Reuters-ontleders het ’n gemiddelde netto wins van E924 miljoen vooruitgeskat.

Société Générale is die eerste van Frankryk se grootste banke om sy kwartaalresultate bekend te maak. BNP Paribas en Credit Agricole sal in die verloop van die week hul kwartaalresultate bekend maak. – Reuters