Washington. – Pres. George W. Bush van die VSA het probleme in die Amerikaanse ekonomie opgesom toe hy tydens ’n private geleentheid gesê het “Wall Street was dronk” en is nou babelas.

“Wall Street was dronk – dis een van die redes hoekom ek gesê het sit die kameras af – hy was dronk en nou is hy babelas,” het Bush by ’n fondsinsamelingsgeleentheid in Houston gesê. “Die vraag is nou hoe lank hy gaan vat om nugter te word en hoe lank hy gaan probeer om allerhande snaakse finansiële instrumente te gebruik.”

Hoewel geen mediakameras by die geleentheid toegelaat is nie, het sy kommentaar kritiek uitgelok toe dit vandag deur die media geweerklank het, nadat ’n televisiekanaal ’n amateurvideo in die hande gekry het.

’n Woordvoerder van die Withuis me. Dana Perino het gesê Bush se mening is niks nuuts nie, dat hy in die verlede finansiële praktyke wat tot die subprimakrisis en kredietknyp gelei het, gekritiseer het, maar dat sy kommentaar dié keer “met meer rondborstigheid en meer blatant” gelewer is.

“Ek dink hy bedoel, soos ek hom vantevore hoor sê het, dat Wall Street in vervoering geraak het,” het Perino gesê. “En Wall Street het nie verstaan nie – die markte het nie die risiko’s verstaan wat hierdie gevaarlike finansiële instrumente inhou nie en nou moet ons dit hanteer.”

– Sapa-DPA