Berlyn. – Mnr. Peer Steinbrueck, Duitsland se minister van finansies, het ’n plan van €50 miljard goedgekeur waarmee een van die land se grootste banke gered gaan word.
Die ooreenkoms wat met private banke aangegaan is om Hypo Real Estate te help is €15 miljard meer werd as die eerste reddingspoging wat eergister in duie gestort het.
Steinbrueck het gesê hulle het ingegryp om die ineenstorting van Hypo Real Estate te keer en só “onberekenbare groot” skade aan Duitsland en finansiële diensverskaffers in Europa te voorkom.
Duitsland het vroeër ’n onbeperkte waarborg vir alle private spaargeld aangekondig. Denemarke het daarna ook sy waarborg gegee. Deense banke het vroeër deposito’s van tot 300 000 Deense krone of $55 000 gewaarborg.
Waarborge wat Ierse en Griekse regerings verlede week gegee het, is in Berlyn en ander Europese hoofstede gekritiseer.
Dié stappe het egter min sekerheid na die Asiatiese markte gebring – Tokio se Nikkei-indeks het met 4,7% tot sy laagste vlak in vier jaar gedaal.
Die onsekerheid in Europa het ook die markte in Australië, Indië en Hongkong met meer as 3% laat daal tydens die eerste verhandelingsessies nadat die VSA Vrydag die reddingspakket van $700 miljard vir sy sukkelende finansiële sektor goedgekeur het.
Die regering van Ysland het maatreëls aanvaar waarvolgens die land se banke van hul buitelandse bates moet verkoop in ’n poging om sy eie finansiële stelsel te steun.
Ysland se geldeenheid het verlede week met ’n vyfde teenoor die dollar getuimel en die regering moes die land se derde grootste bank, Glitnir, nasionaliseer.
Europese regerings is verbysterd en verbaas oor die drama in die wêreldwye bankstelsel. Mnr. Alistair Darling, die Britse minister van finansies, het gesê hy is op die punt om “groot stappe aan te kondig wat nie in normale tye gedoen sou word nie” om die Britse ekonomie te help.
Die leiers van Europa se vier grootste ekonomieë – Duitsland, Frankryk, Brittanje en Italië – het eergister byna ooreengekom op ’n soortgelyke reddingspakket vir banke as die VSA, maar het toe eerder onderneem om die markte te stabiliseer. – BBC
Rand/£: 15.4600
Vind jou ou
