Kampioen-duiweboer (79) tree uit

2019-11-21 06:01
Orgia by haar man, Gert Nell, Uitenhage Posduifklub se kampioen vir die derde agtereenvolgende jaar. Dié bobaas-duiweboer van die Oos-Kaap het aan die einde van die wedvlugseisoen uitgetree. Foto: HEILIE COMBRINCK

Orgia by haar man, Gert Nell, Uitenhage Posduifklub se kampioen vir die derde agtereenvolgende jaar. Dié bobaas-duiweboer van die Oos-Kaap het aan die einde van die wedvlugseisoen uitgetree. Foto: HEILIE COMBRINCK

Multimedia   ·   User Galleries   ·   News in Pictures Send us your pictures  ·  Send us your stories

DIE bekende Oos-Kaapse duiweboer Gert Nell (79) het na dekades se deelname aan wedvlugte en drie agtereenvolgende kampioenjare uitgetree.

Dié jaar nog het sy wedvlugduiwe se prestasies gemaak dat hy as die klubkampioen van die Uitenhage Posduifklub aangewys is.

In 2018 en 2017 is Gert óók as klubkampioen aangewys.

“Toe ek in 1956 met duiwe-wedvlugte begin het, was ek só jonk dat my pa ’n brief aan die klub moes skryf om toestemming te gee dat ek mag deelneem,” sê Gert.

Hy sê daar was uitstekende leermeesters wat hom kosbare lesse oor dié sport geleer het. Manne soos Colin Wheedy, Alan Frost, Dougie Stanton en Jack van der Merwe.

“In my heel eerste wedvlug het ek ’n tweede plek behaal,” sê Gert.

Dit was ook die jare wat die Suid-Afrikaanse Spoorweë duiwetrokke gehad het. Wedvlugduiwe is teen ’n minimale koste vervoer en die stasiemeesters het hulle op ’n bepaalde tyd vanaf die perron vrygelaat. Oefenvlugte is ook per trein gedoen en mandjies is gratis teruggestuur.

In die afgelope drie seisoene het Gert se duiwe 38 wedvlugte gewen.

Dit te midde van sterk kompetisie van duiwe uit die hokke van Deon van Loggenberg, Clayton van der Westhuizen, Deon Gouws, Tiekie Transell en Herman Oosthuizen.

“Seën die duiwe”

Langs die sy van dié suksesvolle duiweboer staan sy vrou Orgia, wat sedert 1973 tot en met sy uittrede, ewe passievol oor die duiwe was.

As ’n duiweboer goeie resultate in dié kompeterende sport wil geniet, moet hy volgens Orgia elke dag sy duiwe op die pad kry.

“Op die kort pad so vier keer ’n week en die langer pad drie keer. Hoe meer hulle oefen of padwerk kry, hoe skerper word hulle. Hulle kry spoed en is dan gesond en fiks,” sê Orgia.

“My man het nooit sy duiwe ver van sy hokke losgelaat nie. Net so 23km uit Uitenhage op die Kirkwood-pad tot daar by Gert-se-Draai, ’n plek wat ander duiweboere na hom vernoem het.”

Elke Donderdag wat Gert met sy duiwe klub toe gaan, dra Orgia die mandjies tot by die kar, sit haar hande op die bokse en vra dan dat “Die liewe Vader hulle moet seën en elke duifie weer veilig vir ons terugbring. En dit gebeur!”

Wedvlugduiwe verg 365 dae se harde werk. Gert sê sy vrou se entoesiasme en hulp deur al die jare was sy dryfkrag.

“Ons duiwe het al alle afstande gewen wat jy in duiwesport kan wen. Vir my vrou is elke wen ’n groot prestasie. Ek is haar ewig dankbaar vir al die jare wat sy my in dié sport waarvoor ons so lief is geondersteun het,” sê Gert.

Duiweskoue

Gert het ook duiwe geskou en sy eerste skou was in 1988 op Queenstown. Daarna het sy duiwe by verskeie streekskoue sowel as by vier Suid-Afrikaanse skoue gepronk. In Bloemfontein, waar 22 miljoeners, onder andere Boet Troskie hulle duiwe by ’n SA-skou geskou het, het Gert se duif ’n vyfde plek behaal.

By die daaropvolgende SA’s het hy twee derde plekke en uiteindelik ’n eerste plek behaal.

Duiweboer met meeste wedvlugte

Gert het nie uitgetree oor gesondheidsredes nie, maar uit eie keuse. Hy is op 79-jarige ouderdom die oudste aktiewe lid in die OP-wedvlugunie.

“Ek dink ek is verreweg die duiweboer wat die meeste jare van wedvlugte in die OP-unie agter die rug het,” sê Gert.

Sy uittrede beteken dat hy nou sy duiwe verkoop, maar hy gaan ’n paar broeiduiwe hou om hom en Orgia nog besig te hou.

“Ons is te lief vir die duiwe om alles op te gee. Om in die bed te lê en die duiwe se vroegoggend gepronk en gekoer in die hokke te hoor, is so ’n lekker gevoel om elke dag mee te begin,” sê Gert.

NEXT ON NEWS24X

Inside News24

 

Matric Results are coming soon!

Notify me when results become available

This site is protected by reCAPTCHA and the Google Privacy Policy and Terms of Service apply.

/News
Traffic Alerts
There are new stories on the homepage. Click here to see them.
 
English
Afrikaans
isiZulu

Hello 

Create Profile

Creating your profile will enable you to submit photos and stories to get published on News24.


Please provide a username for your profile page:

This username must be unique, cannot be edited and will be used in the URL to your profile page across the entire 24.com network.