Hallo Dr. Bets

Ek het deur die argiewe gesoek en die naaste wat ek kon kry is
'Swollen Feet Lyn 28/11/2007' maar dit is nie dieselfde nie.

Gisteroggend het ek, na ek opgestaan het, agtergekom dat die vel om my bene en kuite gespanne voel. Gistermiddag het ek opgemerk dat my kuite en enkels gewel is. Vanmôre lyk my voetbrue ook geswel, maar tog is dit asof die spanning op die vel minder is - hopelik is die swelsel aan die afneem (maar nog nie opsigtelik nie). Dit is slegs my kuite, enkels en voete.

Ons woon op 'n warm kusdorp en was vir die hele Desember weg, en het insekbestryders op die vloere aangewend (het jy al Durbs se kakerlakke gesien:-), en loop kaalvoet in die woonstel, maar miskien soek ek net troos in daardie raaiskoot. Ek twyfel of dìt die rede kan wees. Ek het dit nog nooit voorheen ervaar nie.

Ek is sowat 10 kg oorgewig, maar die huidige 8.5 kilometer stap in die oggende, sal dit afskud. Daar is geen gepaardgaande pyn met die swelling nie.

Ek drink Eltroxin (150 mg) elke oggend asook Turbovite en Athro Guard.

Dave