OWESILISA yaKwaZayeka e-Sweetwaters usephila ngokuvuka njalo ekuseni akhiphe inhlabathi namanzi okusuka emgwaqeni kungene emzini wakhe uma kunethile ngenxa yokuthi umgwaqo wakhiwa wangaqedwa.
UMnuz Caphas Mlawuza uthi le nkinga yaqala eminyakeni engaphezu kweyi-10 eyedlule nalapho kwafika inkontilaki yakha umgwaqo owaziwa ngoSkhakhane Road kodwa yawushiya ingawuqedanga.
UMnuz Mlawuza uthi usekhulume namakhansela kwaze koma amathe kodwa akukho okwenzekayo.
“Njengoba kuyi hlobo kuhlezi kunetha imvula, ungabona ukuthi igceke lami liba njani. Kuguguleka yonke inhlabathi emgwaqeni igcwale ebaleni.
“Sekuze kwavuleka nemigodi emgwaqeni okuyiyona edonsa amanzi angena kwami.
“Uma linethile asikwazi ukusebenzisa indlu yangasese ngoba isuke igcwele amanzi.
“Sengize ngazama ukuvula imisele emibili ephumela ngaphandle ukuze amanzi lawa asuka emgwaqeni ezongena kuyona bese ayochitheka ngaphandle.
“Lo mgwaqo kwakumele ufakwe itiyela kodwa bafika bawumba bawufaka inhlabathi bashaya utshani. Kuze kube yimanje abaphindanga babuya,” kuchaza yena.
Uqhube wathi useliphonsile ithawula ngokuthi uyophinde ulungiswe lo mgwaqo.
Uthe amanzi nenhlabathi okusuka emgwaqeni kungena emzini wakhe kuphela, nakuchaze ngokuthi kungenzeka ukuthi ingoba wakhe eduze kwawo umgwaqo.
“Sekusele kancane ukuthi lamanzi nale nhlabathi kungene kugcwale ekhishini lami uma kunethile.
“Lento iyangihlupha emphefumulweni kangangoba senginqume ukuthi uma kungena ubusika ngizovele ngibiye ngezitina ukuze ngizovimbela le nhlabathi namanzi ukuba kungene ngaphakathi ebaleni.
“Lento ingandisela izinkinga ngoba manje sekumele ngisebenzise imali yami.
“Ngiziphilela ngemali yesibonelelo sikahulumeni kodwa ayikho into engizoyenza ngoba ngeke ngize ngikwazi ukuhlala kanjena impilo yami yonke.”
