Johannesburg - Kuboshwe umsolwa uboshiw ngemuva kwezinsolo zokubayingxenye yesigameko esikhulu sokubanjwa inkunzi imoto yemali eyayihambisa imali e-Kempton Park eGoli.
UNathaniel Nathi Mafala, 32, ubhekene necala lokuzama ukubulala, ukuphanga ehlomile, ukutholakala nesibhamu esingekho emthethweni nokutholakala nempahla eyebiwe.
UMafala wanqatshelwa ibheyili eNkantolo yeMantshi yasePretoria ngoLwesihlanu.
OLUNYE UDABA:Kudutshulwe umsolwa kubanjwa inkunzi iveni lemali eGoli
Okhulumela amaphoyisa ophiko loKlebe, uCaptain Ndivhuwo Mulami uthe esitatimendeni, uMafala usolwa ngokuba ngomunye wabasolwa abaqhumisa baphinde babamba inkunzi imoto yemali i-G4S ngomhlaka-21 Januwari ku-N1. Badubula imoto yemali bayimise eceleni kongwaqo. Umshayeli nomunye umgibeli babanjwa inkunzi izibhamu, izigebengu zabaleka nesamba semali esingaziwa.
Uphenyo loKlebe laholela ekutheni kuboshwe uMafala ngomhlaka-20 Febhuwari eSoshanguve eduzane nasePitoli.
Usolwa ngokutholakala no-ova, okhiye, isibhamu esingekho emthethweni nemali okusolwa ukuthi yathathwa endaweni yeisgameko.
"Kutholwe enye imali engu-R100 000 emzini wabazali wakhe oseBritz," kusho uMulamu.
UMafala uzophinde avele enkantolo ngomhlaka-19 Mashi. Kulindeleke ukuba kuboshwe abanye abasolwa.
