Kudutshulwe ingane yentombazane eneminyaka emine ubudala e-Uitsig, ngaphandle kwaseKapa, kusho amaphoyisa aseWestern Cape.
Amaphoyisa athi le ngane ithelwe ngamachaphazelo ngesikhathi kunempi yezulu lezandla phakathi kwamaqembu ezigelekeqe.
Lesi sigameko kuthiwa senzeke kuCedar Close, ngaku-Uitsig Avenue, ngabo-13:00 ngoLwesithathu ntambama.
Okhulumela amaphoyisa uFrederick van Wyk uthe: “Sivule icala lokubulala ukuze kuqhutshwe uphenyo. Sinxusa umphakathi ukuba usilekelele. Sicela ongaba nolwazi ngalesi sehlakalo ukuba asize amaphoyisa ngophenyo ngokuxhumana neCrime Stop."
OLUNYE UDABA: Kudubuleke umfana,6, kudubulana izigebengu nonogada
Kwesinye isigameko esingahlobene nalesi, kube nokudubulana ngesikhathi kuqhubeka isigameko sokuphanga kuhlonyiwe eWestville Shopping Centre ngoLwesithathu ntambama.
Okhulumela iBlue Security, u-Andreas Mathios, uthe abasolwa abahlanu abebehlomile abebegqoke amakepisi e-baseball, bangene kule nxanxathela ngezikhathi zasemini.
“Bavimbezele abasebenzi esitolo sobucwebe, badubula izikhawu eziyisikhombisa ngesikhathi sebebaleka," kusho uMathios.
“Iphoyisa ebelingekho emsebenzini libe selidubula kabili libhekise ngakubasolwa ngaphambi kokuba amaphoyisa abajahe kwaboshwa abasolwa ababili.
"Kubonakale igazi phansi kanti kusolakala ukuthi ngelomunye wabasolwa abakwazile ukubaleka. Akukho muntu omunye olimalile kulesi sigameko," esho.
