Sekubalekelana izinceku ngenxa yemali

2017-12-21 18:00

Durban - Ukhala uyazithulisa umfundisi othi ubalekelwa ngomunye umfundisi emuva kokuba emuboleke imali engaphezu kuka-R60 000 - okumanje osekubonakala sengathi le nceku kayisazimisele nhlobo ukuyikhokha njengoba ekholwa wukuthi isiyamubalekela.

UMfu Bhekumuzi Vundla waKwaCeza, ngasoNdini, enyakatho yeKwaZulu-Natal, usola uMfu Zakhele Sithole webandla iFree Salvation Ministries International KwaMaphumulo, enyakatho-mpumalanga yeKwaZulu-Natal, ngokumubalekela nale mali athi umuboleke yona ngoNtulikazi (July) wangonyaka wezi-2015 ngoba ekhala ngokuthi kushile lapho asebenzela khona kwasha imishini asebenza ngayo ebhizinisini lakhe.

Uthi sekumcacele bha ukuthi uMfu Sithole akazimisele nhlobo ngokukhokha le mali kwazise usakhokhe u-R2 000 nje kuphela.

Uveze ukuthi phezu kwalo R60 000, ubuyile uMfu Sithole wayoboleka u-R6 700 wathi kunesimo esiphuthumayo, lena uzoyibuyisa isiwu-R10 000. "Uthe uma esho njalo, ngathi kasikho isidingo sokuthi ayibuyise isizalile, yena angakwenza nje wukungibuyisela yona injengoba injalo ngoba ngiyamusiza, kangizalisi imali,” kusho uMfu Vundla.

Uthi kuthe uma sekufika isikhathi abebevumelene ukuthi bazokhokhelana ngaso, uMfu Sithole waqala wabika imbiba wabika ibuzi.

UMfu Vundla uthi yilapho abone khona ukuthi sekuyoba yinhlanhla eyitholile imali yakhe kwazise uMfu Sithole ubeseyikhokha ngenkulungwane - wagcina engasamtholi nhlobo ocingweni lwakhe.

Utshele ILANGA ukuthi le mali iphume ngemuva kokuba eyeke emsebenzini ngoba efuna ukuziqalela ibhizinisi kodwa wagcina esezwelana noMfu Sithole wamboleka yona kwazise ubengazibekile phansi emkhalela, emubalisela.

"Ngenxa yokuthi besesijwayele ukubonana kwazise ubesenokungimema ezinkonzweni zakhe, ngigcine sengimzwela. Bengisiqonda nesimo abebhekene naso ukuthi uma ngingamlekeleli ibhizinisi lakhe lizowa," kusho uMfu Vundla.

Uthi ukumnika kwakhe imali lokhu asola ukuthi kube yisichitho ngoba uMfu Sithole uyekile ngisho ukumumema ezinkonzweni abejwayele ukumumema kuzona, kwagcina sekunzima nanokuthi amthole.

OLUNYE UDABA: Kuqubuke ingxabano kubangwa imali yomnikelo

Uhoshe umoya wokuthi uMfu Sithole uthole ithenda yokuphakelwa kwabafundi ezikoleni, okuthe uma esemcela ukuba amkhokhele wathi kakuyona eyakhe imali azoyenza ngalolu hlelo kodwa uzokhokhela ngayo udadewabo naye obemboleke imali.

"Ube esethi uzonginika u-R5 000, ngawunqaba ngathi ngicela imali yami injengoba injalo ngoba nami sengidinga ukuyisebenzisa kwazise nami ngiyeke emsebenzini ngoba ngifuna ukuziqalela awami amabhizinisi," kusho yena. Ethintwa ngalezi zinsolo uMfu Sithole, uqale wakhuluma ngesikhulu isizotha nentatheli wayichazela ukuthi konke lokhu okushiwo yinceku kuliqiniso, okungelona iqiniso wuthi akasatholakali.

"Ngizamile ukuyikhona imali yakhe ngezinkulungwane, wangikhalela wathi akayizwa uma ngiyikhokha ngaleyo ndlela. Ngibe sengithi kuyena ngizoyikhokha ngo-R5 000 wala waphetha wathi uyifuna iphelele," kusho yena. Ube esecela ILANGA ukuba limbonise limtshele nangamalungelo akhe, okuyilapho etshelwe khona ukuthi unalo ilungelo lokuziphendulela noma angaphenduli.

Ukhale ngokuthi leli phephandaba kalikhombisi ukuba nobuntu njengoba likhombisa ukungazwelani neze naye.

Ulisole ngokuzwelana noMfu Vundla nokuvumela ukusetshensizwa ekutheni kudicilelwe phansi igama lakhe, kubukiswe ngaye ebandleni lakhe.

"Yini inhloso yakhe ngokutshela nina izindaba eziphakathi kwami naye? Nawe uze uyakhuluma nje kawukhombisi ukuba ngumuntu uzwelane nami sengathi wena kawunazo izikweletu," kusho uMfu Sithole.

Ugcine esecela ukuthumelela izimpendulo ezibhalwe phansi yize noma ebese ephendulile waze wageqa amagula ngesikhathi ekhuluma ngomlomo.

Ube esethumelela isitatimende esithi: "Ubudlelwano bami noMfu uVundla ngobenkolo yobuKrestu, inkolo yethu kayisivumeli ukuthi uma sixabane sodwa bese siphumela ngaphandle ukuyoxazulula udaba.

Ngakho ngicela ukungaziphenduleli kule nkundla ngicela uVundla alandele inqubo yebandla ukuze kube nesixazululo kulokho akhala ngakho ngami.

Angalandela ukusho kweZwi kuMathewu 18:18 noku 1 KwabaseKorinte 6:1. ngiyabonga."

Join the conversation!

24.com encourages commentary submitted via MyNews24. Contributions of 200 words or more will be considered for publication.

We reserve editorial discretion to decide what will be published.
Read our comments policy for guidelines on contributions.
NEXT ON NEWS24X

AB praises selfless skipper

2010-11-21 18:15

Inside News24

 
/News
Traffic Alerts
Traffic
There are new stories on the homepage. Click here to see them.
 
English
Afrikaans
isiZulu

Hello 

Create Profile

Creating your profile will enable you to submit photos and stories to get published on News24.


Please provide a username for your profile page:

This username must be unique, cannot be edited and will be used in the URL to your profile page across the entire 24.com network.

Settings

Location Settings

News24 allows you to edit the display of certain components based on a location. If you wish to personalise the page based on your preferences, please select a location for each component and click "Submit" in order for the changes to take affect.




Facebook Sign-In

Hi News addict,

Join the News24 Community to be involved in breaking the news.

Log in with Facebook to comment and personalise news, weather and listings.