'Ukufunda yiyona ndlela yokuthuthukisa isizwe sethu'

2017-08-18 16:01

Durban - UNoxolo Khanyile oneminyaka engu-30 ubudala  owakhulela eMgungundlovu wahlala khona waze waqeda umatikuletsheni wafunda wagcina enyuvesi, iDurban University of Technology enza izifundo zeTranslation and Interpreting Practice.

UKhanyile njengamanje usebenzela inkampani yokushicilela eseMgungundlovu kanti futhi usebenza kakhulu ngezilimi zesintu.

"Umsebenzi engiwenzayo ngiwuthokozela kakhulu, ikakhulukazi njengoba ukufunda kuyiyona ndlela yokuthuthukisa isizwe nezwe lethu.

"Angizisoli nakancane ngomsebenzi engiwenzayo, empeleni usuku nosuku ngisuke ngilangazelele okusha nokungenza ngihlale ngithokozile emkhakheni engikuwo," echaza.

OLUNYE UDABA: ISecret of Success igubha inyanga yabesifazane

Elandisa uthe inyanga yabesifazane isho lukhulu kuye njengoba kusuke kubungazwa ubuqhawe nobuhlakani balabo besifazane ababamba imashi belwa nengcindezelo ngo-1956.

"Lesi senzo sabo asigcinanga ngokunikeza bona kuphela inkululeko kepha kwaba nomthelela omuhle ngisho nasesizweni sonkana.

"Imashi abayibamba yasikhulula sonke njengabantu abansundu baseNingizimu Afrika. Ngingowesifazane osemncane kungenza ngiziqhenye ngobulili bami nangalaba besifazane ababamba iqhaza elikhulu kangaka," esho.

Uqhuba athi: "Uma ngingase nginikezwe ithuba lokuqinisekisa ukuphepha kwabesifazane ngingaqinisekisa ukuthi wonke umuntu wesifazane wenza izifundo zokuzivekela, bese ngibagqugquzela ukuba bazimele, uma kwenzeka bebhekana nesimo sokuhlukumezeka benze isiqiniseko sokuthi abathuli (bagcine beyizisulu nje) kepha bathathe izinyathelo zomthetho, babike emaphoyiseni ukuze bezothola usizo."

Uthe ukholelwa ukuthi isikhathi esiphila kuso sesihlukile kunakuqala lapho kwakuba yichilo ukukhuluma ngokuhlukumezeka, ngakho-ke angagqugquzela kakhulu abesifazane ukuba babhukule balwisane nokuhlukunyezwa futhi besekane.

Uthi kubalulekile ukuthi abesifazane baziqhenye ngalokhu abayikho.

Uthe eminyakeni emihlanu ezayo uzibona ezingeni eliphakeme kunaleli akulo ngokwemfundo.

"Ngizibona ngenza izinkulumo ezithuthukisa isizwe sethu ngokugqugquzela ubumbano, ukuzigqaja ngobuwena kanye nokutshela abantu abasha ngokubaluleka kwemfundo," ephetha.





NEXT ON NEWS24X

AB praises selfless skipper

2010-11-21 18:15

Inside News24

 
/News
Traffic Alerts
Traffic
There are new stories on the homepage. Click here to see them.
 
English
Afrikaans
isiZulu

Hello 

Create Profile

Creating your profile will enable you to submit photos and stories to get published on News24.


Please provide a username for your profile page:

This username must be unique, cannot be edited and will be used in the URL to your profile page across the entire 24.com network.