Durban - Isilomo somculo we-gospel, uDumi Mkokstad, sithi ngeke siliphonse ithawula ngokudlala kwiPremier Soccer league (PSL).
UMkokstad okumanje ugijima kwi-Next XI Academy edlala esigabeni se-SAB League ngaphansi kwe-SAFA eThekwini, uthi ufisa ukudlala kwi-PSL ebalwa namaligi ahamba phambili emhlabeni jikelele.
Uthi okumfaka ugqozi nofuqufuqu lokubona leli phupho lakhe lifezeka wukuthi iqembu agijima kulona liphethwe nguMabhudi Khenyeza ozakhele udumo kusona lesi sigaba.
OLUNYE UDABA: Ugadle kumlandeli omsole ngokuzenza uBonang
Exoxa neLANGA leTheku, uMkokstad uthe usenethemba lokuthi iphupho lakhe lizofezeka, inqobo nje uma engazinikela ngokugcwele.
“Kunzima ukuhlanganisa umculo nebhola likanobhutshuzwayo. Umculo yiwona engiphila ngawo, ngakho kunzima ukumane ngiwuyeke nje, kanti nebhola ngiyazifela ngalo kusukela ebuncaneni bami,” kusho lo mculi, enezela ngokuthi uke wama kancane ebholeni njengoba bekuwuDisemba, ematasa.
“Nakuba ngiwumlandeli wokuqina weKaizer Chiefs, ngiyayithanda indlela iPirates edlala ngayo, yingakho nginesifiso sokugijima kuyona.”
